சபாநாயகர் ஜகத் விக்கிரமரத்னவுக்கு எதிராக நம்பிக்கையில்லாப் பிரேரணை ஒன்றை முன்வைக்க எதிர்க்கட்சிகள் தீர்மானம்!

நாடாளுமன்ற சபாநாயகர் ஜகத் விக்கிரமரத்னவுக்கு எதிராக விரைவில் நம்பிக்கையில்லாப் பிரேரணை ஒன்றை முன்வைக்க எதிர்க்கட்சிகள் தீர்மானித்துள்ளதாக தகவல்கள் வெளியாகியுள்ளன.

எதிர்க்கட்சித் தலைவர் சஜித் பிரேமதாஸ தலைமையில் கடந்த வாரம் நடைபெற்ற எதிர்க்கட்சி நாடாளுமன்றக் குழுக் கூட்டத்தில் இந்த முடிவு எடுக்கப்பட்டதாக தெரிவிக்கப்படுகிறது.

சபாநாயகர் அரசமைப்புச் சட்டத்தையும், நாடாளுமன்ற நிலையியற் கட்டளைகளையும் மீறியுள்ளார் என்ற குற்றச்சாட்டின் அடிப்படையில் இந்த பிரேரணை முன்வைக்கப்பட உள்ளது என்று எதிர்க்கட்சி உறுப்பினர்கள் கூறுகின்றனர்.

உயர் நீதிமன்றம் மற்றும் மேன்முறையீட்டு நீதிமன்றத்தின் வெற்றிடங்களை நிரப்புவது தொடர்பான விவகாரத்தில் நாடாளுமன்றத்தின் ஆதரவை வழங்கத் தவறியதாகவும், இதைச் சபையில் சமர்ப்பித்த போதிலும் சபாநாயகர் கவனம் செலுத்தவில்லை என்றும் அவர்கள் குற்றம் சாட்டுகின்றனர்.

மேலும், நிலையியற் கட்டளைகளுக்கு ஏற்ப எதிர்க்கட்சி உறுப்பினர்கள் அளிக்கும் கடிதங்களை ஏற்க மறுத்துள்ளதாகவும் குற்றச்சாட்டுகள் முன்வைக்கப்பட்டுள்ளன.

இந்த நம்பிக்கையில்லாப் பிரேரணையை தயாரிக்கும் பணிகள் தற்போது எதிர்க்கட்சி சட்டத்தரணி எம்.பிக்கள் அடங்கிய குழுவிடம் ஒப்படைக்கப்பட்டுள்ளதாகவும் தெரிவிக்கப்படுகிறது.

இதன் மூலம் நாடாளுமன்றத்தில் எதிர்வரும் நாட்களில் தீவிர அரசியல் விவாதங்கள் உருவாகும் என எதிர்பார்க்கப்படுகிறது.