நாடுமுழுவதும் கொட்டித் தீர்க்கப்போகும் கனமழை - அதிகரிக்கும் காற்றின் வேகம்!

அயன அயல் ஒருங்கல் வலயத்தின் தாக்கம் காரணமாக, இலங்கைக்கு மேலான வளிமண்டலத்தின் கீழ்மட்டத்தில் நிலையற்ற தன்மை (தளம்பல் நிலை) அதிகரித்து வருகிறது. இதன் விளைவாக, இன்று முதல் அடுத்த சில நாட்களுக்கு நாடு முழுவதும் மழைவீழ்ச்சி அதிகரிக்கும் என வளிமண்டலவியல் திணைக்களம் அறிவித்துள்ளது.

நாட்டின் பெரும்பாலான பகுதிகளில் பிற்பகல் 1 மணிக்குப் பின்னர் மழை அல்லது இடியுடன் கூடிய மழை பெய்யக்கூடும். கிழக்கு மற்றும் தென் மாகாணங்களில் காலை நேரங்களிலும் மழை பெய்ய வாய்ப்புள்ளது. மேலும், மத்திய, சப்ரகமுவ, வடமத்திய மற்றும் ஊவா மாகாணங்களின் சில இடங்களில் 100 மில்லிமீற்றரை மீறும் கனமழை பதிவாகலாம்.

நாட்டைச் சூழ்ந்துள்ள கடல் பிராந்தியங்களிலும் மழை அல்லது இடியுடன் கூடிய மழை காணப்படும். தென்மேற்குத் திசையில் இருந்து மணித்தியாலத்திற்கு 25–35 கிலோமீட்டர் வேகத்தில் காற்று வீசும்.

புத்தளம் முதல் மன்னார் ஊடாக காங்கேசன்துறை வரை, மேலும் மாத்தறை முதல் ஹம்பாந்தோட்டை ஊடாக பொத்துவில் வரை உள்ள கடல் பிராந்தியங்களில், காற்றின் வேகம் மணித்தியாலத்திற்கு 40–45 கிலோமீட்டர் அல்லது அதற்கு மேல் அதிகரிக்கக்கூடும். இதனால், இப்பகுதிகளில் கடல் நிலை ஓரளவு கொந்தளிப்பாக காணப்படும்.

இடியுடன் கூடிய மழை பெய்யும் நேரங்களில் திடீர் பலத்த காற்று வீசக்கூடும். அத்தகைய சந்தர்ப்பங்களில் கடல் தற்காலிகமாக மிகவும் கொந்தளிப்பானதாக மாறும்.

எனவே, பலத்த காற்று மற்றும் மின்னல் தாக்கங்கள் ஏற்படக்கூடிய சூழ்நிலைகளில் பொதுமக்கள் மிகுந்த அவதானத்துடன் செயற்படுமாறு கேட்டுக்கொள்ளப்படுகின்றனர்.