மின் கட்டணத்தில் புதிய திட்டம்!

இலங்கையில் தற்போது நடைமுறையில் உள்ள மூன்று மாதங்களுக்கு ஒருமுறை மின்சாரக் கட்டணத்தை மாற்றும் முறைக்கு மாற்றாக, ஆண்டிற்கு ஒருமுறை மட்டுமே கட்டணத்தை திருத்தும் புதிய நடைமுறை ஒன்றை அறிமுகப்படுத்த எரிசக்தி அமைச்சு கவனம் செலுத்தி வருகிறது.

இந்த புதிய கட்டண முறையை வடிவமைப்பதற்காக எரிசக்தி அமைச்சும் நிதி அமைச்சும் இணைந்து கலந்துரையாடல்களை முன்னெடுத்து வருகின்றன. ஆண்டின் ஆரம்பத்தில் காணப்படும் வறட்சி நிலையும், இறுதிப் பகுதியில் கிடைக்கும் அதிக மழைப்பொழிவும் கருத்தில் கொள்ளப்பட்டு இந்த திட்டம் உருவாக்கப்படுகின்றது.

தற்போதைய முறையில், வறட்சி காலங்களில் மின்சாரக் கட்டணம் அதிகரித்து, மழைக்காலங்களில் குறைவது போன்ற நிலை காணப்படுகிறது. ஆனால் புதிய முறையின் கீழ், ஆண்டின் தொடக்கத்தில் ஒருமுறை நிர்ணயிக்கப்படும் கட்டணம் முழு ஆண்டும் நடைமுறையில் இருக்கும்.

இதனால் வருடத்தின் முதல் பாதியில் மின்சார சபைக்கு நட்டம் ஏற்பட்டாலும், பின்னர் கிடைக்கும் வருவாயின் மூலம் அதனை சமநிலைப்படுத்த முடியும் என அதிகாரிகள் நம்புகின்றனர். மேலும், ஒரே மாதிரியான கட்டண அமைப்பு இருப்பதால், வீடுகள் மற்றும் தொழில் நிறுவனங்கள் தங்களின் செலவுத்திட்டங்களை தெளிவாக முன்கூட்டியே திட்டமிடும் வசதி கிடைக்கும்.

மின்சாரக் கட்டண மாற்றங்கள் அடிக்கடி ஏற்படுவது சந்தையில் பொருட்களின் விலைகளிலும் பாதிப்பை ஏற்படுத்துகிறது. ஆண்டு ஒருமுறை மட்டுமே மாற்றம் செய்யப்பட்டால், விலைகளில் திடீர் ஏற்றத்தாழ்வுகள் குறையும் என எதிர்பார்க்கப்படுகிறது.

இந்த புதிய சூத்திரம் இறுதி செய்யப்பட்டதும், அது ஒப்புதலுக்காக இலங்கை பொதுப் பயன்பாடுகள் ஆணைக்குழுவிற்கு அனுப்பப்படும் என தெரிவிக்கப்படுகிறது.