இடப்பற்றாக்குறை: முதல்வர் அலுவலகம் நாமக்கல் கவிஞர் மாளிகைக்கு மாற்றம்!

சென்னை செயின்ட் ஜார்ஜ் கோட்டை தலைமைச் செயலகத்தில் நீண்ட காலமாக நிலவி வரும் இடப்பற்றாக்குறை பிரச்சினைக்கு தீர்வு காணும் வகையில், முதல்வர் விஜயின் அலுவலகம் (CMO) விரைவில் நாமக்கல் கவிஞர் மாளிகைக்கு மாற்றப்படவுள்ளதாக அதிகாரிகள் தெரிவித்துள்ளனர். இதற்கான சீரமைப்புப் பணிகள் தற்போது தீவிரமாக நடைபெற்று வருகின்றன.

தற்போது நாமக்கல் கவிஞர் மாளிகை கட்டிடத்தில் 34 அரசு துறைகளின் செயலாளர்கள் மற்றும் பல்வேறு பிரிவுகள் இயங்கி வருகின்றன. 10 மாடிகளைக் கொண்ட இந்தக் கட்டிடத்தின் 10-வது மாடியில், கடலை நேரடியாகக் காணக்கூடிய பகுதியில் முதல்வர் அலுவலகம் அமைக்கப்பட உள்ளது.

கடந்த 60 ஆண்டுகளுக்கும் மேலாக சென்னை செயின்ட் ஜார்ஜ் கோட்டை தலைமைச் செயலகத்தின் முதல் மாடியிலேயே முதல்வர் அலுவலகம் செயல்பட்டு வந்தது. முதல்வர் விஜய் பதவியேற்ற பின்னரும் அங்குதான் அலுவலகப் பணிகள் நடைபெற்று வந்த நிலையில், தற்போது பொதுமக்கள் மற்றும் அதிகாரிகளின் வருகை அதிகரித்துள்ளதால் ஏற்பட்டுள்ள இடப்பற்றாக்குறையை கருத்தில் கொண்டு இந்த மாற்றம் மேற்கொள்ளப்படுவதாக கூறப்படுகிறது.

இந்த மாற்றத்திற்கான பணிகளை பொதுப்பணித் துறை (PWD) தொடங்கியுள்ளது. நாமக்கல் கவிஞர் மாளிகையின் 10-வது மாடியில் உள்ள மாநாட்டு அரங்கிற்கு அருகிலுள்ள உணவகப் பகுதி, முதல்வர் அலுவலகமாக மாற்றப்பட உள்ளது. அங்குள்ள மேஜைகள், நாற்காலிகள் உள்ளிட்ட உபகரணங்கள் கலைவாணர் அரங்கத்திற்கு மாற்றப்படவுள்ளன.

முதல்வர் அலுவலகம் மாற்றப்படுவதையடுத்து, தற்போது 10-வது மாடியில் இயங்கி வரும் சில அரசு துறைகளின் பிரிவுகளும் இடமாற்றம் செய்யப்பட உள்ளன. தகவல் மற்றும் தமிழ் வளர்ச்சித் துறையின் சில பிரிவுகள் கலைவாணர் அரங்கத்திற்கு மாற்றப்படவுள்ள நிலையில், உள்துறை (மதுவிலக்கு பிரிவு) மற்றும் வணிக வரித்துறையின் சில பிரிவுகள் செயின்ட் ஜார்ஜ் கோட்டை வளாகத்திற்குள் உள்ள மாற்று இடங்களில் செயல்படும் என தெரிவிக்கப்பட்டுள்ளது.

இதற்கு முன்பு 2010-ஆம் ஆண்டு அப்போதைய தி.மு.க. ஆட்சியில் தலைமைச் செயலகம் ஓமந்தூரார் அரசினர் தோட்டத்திற்கு மாற்றப்பட்டது. அப்போது முக்கிய அரசு துறைகள் அங்கு செயல்பட்டன. ஆனால் 2011-ஆம் ஆண்டு ஜெயலலிதா தலைமையிலான அ.தி.மு.க. அரசு ஆட்சிக்கு வந்த பின்னர், தலைமைச் செயலகம் மீண்டும் செயின்ட் ஜார்ஜ் கோட்டை வளாகத்திற்கே மாற்றப்பட்டது.

1975-ஆம் ஆண்டு அப்போதைய முதல்வர் மு.கருணாநிதியால் திறந்து வைக்கப்பட்ட நாமக்கல் கவிஞர் மாளிகை, பின்னர் பல கட்டங்களாக புதுப்பிக்கப்பட்டு தமிழக அரசின் முக்கிய நிர்வாக மையங்களில் ஒன்றாக இருந்து வருகிறது.

முதல்வர் அலுவலகம் நாமக்கல் கவிஞர் மாளிகைக்கு மாற்றப்படுவது, தமிழக தலைமைச் செயலக நிர்வாகத்தில் முக்கியமான மாற்றமாக பார்க்கப்படுகிறது. இடவசதி சிக்கலை குறைப்பதுடன், நிர்வாகப் பணிகளை மேலும் திறம்பட மேற்கொள்ளும் நோக்கிலும் இந்த நடவடிக்கை மேற்கொள்ளப்படுவதாக அதிகாரிகள் தெரிவித்துள்ளனர்.