சிறுவர்களிடையே வேகமாக பரவும் நோய்கள் தொடர்பில் எச்சரிக்கை!

கொழும்பு லேடி ரிட்ஜ்வே சிறுவர் வைத்தியசாலையின் விசேட வைத்திய நிபுணர் ஒருவர், தற்போது சிறுவர்களிடையே பல்வேறு தொற்றுநோய்கள் அதிகரித்து வருவதாகவும், பெற்றோர் அதிக அவதானத்துடன் செயல்பட வேண்டும் என்றும் எச்சரித்துள்ளார்.

தற்போது டெங்கு, பருவகால காய்ச்சல், கை–கால்–வாய் நோய் மற்றும் மூளை உறை அழற்சி போன்ற நோய்கள் குழந்தைகளிடையே அதிகமாக பதிவாகி வருவதாக அவர் தெரிவித்துள்ளார்.

டெங்கு நோய் உயிருக்கு ஆபத்தானதாக மாறக்கூடும் எனவும், காய்ச்சல், தலைவலி, கண்களின் பின்னால் வலி, உடல் மற்றும் மூட்டு வலி, வாந்தி, வயிற்றுப்போக்கு போன்ற அறிகுறிகள் காணப்பட்டால் கவனம் செலுத்த வேண்டும் எனவும் அறிவுறுத்தப்பட்டுள்ளது. இரண்டு நாட்களுக்கு மேல் காய்ச்சல் நீடித்தால் உடனடியாக மருத்துவ ஆலோசனை பெற வேண்டும் என வலியுறுத்தப்பட்டுள்ளது.

மேலும், பருவகால காய்ச்சலால் காய்ச்சல், இருமல், சளி, உடல்வலி மற்றும் மூட்டு வலி போன்ற அறிகுறிகள் ஏற்படலாம் என தெரிவிக்கப்பட்டுள்ளது. இவ்வாறான அறிகுறிகள் தென்பட்டால் குழந்தைகளை மருத்துவ பரிசோதனைக்கு அழைத்துச் செல்லுமாறும் கேட்டுக்கொள்ளப்பட்டுள்ளது.

அதேவேளை, கை–கால்–வாய் நோயால் கைகள், கால்கள் மற்றும் வாய்ப்பகுதியில் சிவப்பு புள்ளிகள் மற்றும் கொப்புளங்கள் தோன்றக்கூடும் என்றும், பாதிக்கப்பட்ட குழந்தைகளை சில நாட்கள் வீட்டில் ஓய்வில் வைத்திருக்க வேண்டும் என்றும் அறிவுறுத்தப்பட்டுள்ளது.

மூளை உறை அழற்சியால் காய்ச்சல், கடுமையான தலைவலி, வாந்தி, வெளிச்சத்தைப் பார்ப்பதில் சிரமம் மற்றும் சத்தத்தால் அசௌகரியம் போன்ற அறிகுறிகள் ஏற்படக்கூடும் எனவும் தெரிவிக்கப்பட்டுள்ளது.

இந்த நோய்கள் சுவாசம் மற்றும் உணவுப் பாதைகள் மூலம் பரவக்கூடியதால், சுத்தமான உணவு பழக்கம், கொதித்த நீர் அருந்துதல் மற்றும் அறிகுறிகள் உள்ளவர்கள் முகக்கவசம் அணிதல் போன்ற முன்னெச்சரிக்கை நடவடிக்கைகளை கடைப்பிடிக்குமாறும் பொதுமக்கள் கேட்டுக்கொள்ளப்பட்டுள்ளனர்.

பெற்றோர் குழந்தைகளின் உடல்நிலை மாற்றங்களை தொடர்ந்து கவனித்து, தேவையான நேரத்தில் மருத்துவ ஆலோசனை பெறுவது அவசியம் எனவும் வலியுறுத்தப்பட்டுள்ளது.