16 வயதுக்குட்பட்டோரின் சமூக ஊடகப் பயன்பாட்டை கட்டுப்படுத்த புதிய சட்டமூலம்!

இலங்கையில் 16 வயதுக்குட்பட்ட சிறுவர்கள் சமூக ஊடகத் தளங்களைப் பயன்படுத்துவதைக் கட்டுப்படுத்தும் நோக்கில் தனிநபர் சட்டமூலம் ஒன்று நாடாளுமன்றத்தில் முன்மொழியப்பட்டுள்ளது.

எதிர்க்கட்சி நாடாளுமன்ற உறுப்பினர் ஃபைசர் முஸ்தபாவால் முன்வைக்கப்பட்ட இந்த சட்டமூலம், சமூக ஊடகங்கள் மற்றும் இணைய சேவை வழங்குநர்களுக்கான விதிமுறைகளை அறிமுகப்படுத்துவதை நோக்கமாகக் கொண்டுள்ளது. இதன் மூலம் சிறுவர்கள் தீங்கு விளைவிக்கும் இணைய உள்ளடக்கங்கள் மற்றும் செயல்பாடுகளிலிருந்து பாதுகாக்கப்பட வேண்டும் என தெரிவிக்கப்பட்டுள்ளது.

சட்டமூலத்தின் படி, சமூக ஊடக நிறுவனங்கள் 16 வயதுக்குட்பட்ட பயனர்கள் தளங்களை அணுகுவதைத் தடுக்கவும், வயது வரம்பு கட்டுப்பாடுகளை அமல்படுத்தவும் வேண்டியிருக்கும். மேலும், சிறுவர்கள் இணைய சேவைகளை பயன்படுத்தும் நேரம் மற்றும் கால அளவுகள் மீதும் கட்டுப்பாடுகள் விதிக்கப்படலாம்.

இத்துடன், இந்த கட்டுப்பாடுகளை அமல்படுத்துவதற்கான விதிமுறைகளை வகுக்க சம்பந்தப்பட்ட அமைச்சருக்கு அதிகாரம் வழங்கப்படுவதுடன், தேசிய சிறுவர் பாதுகாப்பு அதிகார சபையின் கீழ் ஒரு அங்கீகரிக்கப்பட்ட ஆணையரை நியமித்து கண்காணிப்பு மற்றும் விசாரணை நடவடிக்கைகள் மேற்கொள்ளவும் ஏற்பாடு செய்யப்பட்டுள்ளது.

இந்த சட்டமூலம் நடைமுறைக்கு வந்தால், இலங்கையில் உள்ள பயனர்களுக்கு சேவைகளை வழங்கும் சமூக ஊடக நிறுவனங்கள் அனைத்துக்கும் இது பொருந்தும் என தெரிவிக்கப்பட்டுள்ளது.