போதைப்பொருள் கைப்பற்றப்பட்ட சம்பவம் தொடர்பில் கைதான 22 பௌத்த பிக்குகள் : நீதிமன்றம் பிறப்பித்த உத்தரவு!

பண்டாரநாயக்க சர்வதேச விமான நிலையத்தில் போதைப்பொருள் கைப்பற்றப்பட்ட சம்பவம் தொடர்பில் கைது செய்யப்பட்ட 22 பௌத்த பிக்குகளை எதிர்வரும் மே மாதம் 2 ஆம் திகதி வரை விளக்கமறியலில் வைக்குமாறு நீர்கொழும்பு நீதவான் நீதிமன்றம் உத்தரவிட்டுள்ளது.

விமான நிலையத்தில் சந்தேகத்திற்கிடமான குஷ் மற்றும் ஹஷிஷ் வகை போதைப்பொருட்களின் பெரிய தொகை கண்டுபிடிக்கப்பட்டதைத் தொடர்ந்து, இந்த கைது நடவடிக்கை இடம்பெற்றுள்ளது. பின்னர் கைது செய்யப்பட்டவர்கள் நீதிமன்றத்தில் ஆஜர்படுத்தப்பட்டனர்.

புலனாய்வுப் பிரிவினருக்கு கிடைத்த தகவலின் அடிப்படையில், பொலிஸ் போதைப்பொருள் ஒழிப்புப் பிரிவினர் மேற்கொண்ட சுற்றிவளைப்பின் போது குறித்த பிக்குகள் கைது செய்யப்பட்டதாக தெரிவிக்கப்படுகிறது.

இந்த போதைப்பொருள் எங்கிருந்து கொண்டு வரப்பட்டது, இதற்கான நிதியுதவி வழங்கியவர்கள் யார், மேலும் இந்த கடத்தல் வலையமைப்பில் வேறு நபர்கள் தொடர்புடையவர்களா என்பது குறித்து மேலதிக விசாரணைகள் நடைபெற்று வருவதாக அதிகாரிகள் தெரிவித்துள்ளனர்.