நாட்டில் சர்க்கரை பயன்பாடு 3½ மடங்கு அதிகரிப்பு – வாய் சுகாதாரத்திற்கு பெரும் ஆபத்து!

உலக சுகாதார அமைப்பு (WHO) பரிந்துரைக்கும் அளவைக் காட்டிலும் நாட்டில் சர்க்கரை பயன்பாடு மூன்றரை மடங்கு அதிகமாக இருப்பதாக பல் அறுவை சிகிச்சை நிபுணர் டாக்டர் சந்தன கஜநாயக்க தெரிவித்துள்ளார்.

ஒரு நபர் ஆண்டுக்கு சராசரியாக சுமார் 34 கிலோ கிராம் சர்க்கரையை உட்கொள்வதாகவும், ஆனால் WHO பரிந்துரையின் படி ஒரு ஆரோக்கியமான நபர் ஆண்டுக்கு சுமார் 10 கிலோ கிராம் சர்க்கரை மட்டுமே உட்கொள்ள வேண்டும் என்றும் அவர் குறிப்பிட்டார்.

அதிகளவில் சர்க்கரை உட்கொள்வது பற்கள் மற்றும் ஈறுகளுடன் தொடர்புடைய பல்வேறு நோய்களுக்கு முக்கிய காரணமாக இருப்பதாகவும் அவர் எச்சரித்துள்ளார்.

மேலும், நாட்டில் வயது வந்தவர்களில் சுமார் 50 சதவீதம் பேர் ஈறு நோயால் பாதிக்கப்பட்டுள்ளதாகவும், அதாவது இரண்டு பெரியவர்களில் ஒருவருக்கு ஈறு நோய் இருப்பதாகவும் தெரிவிக்கப்பட்டுள்ளது.

ஐந்தாவது தேசிய வாய்சுகாதார ஆய்வு தொடர்பான செய்தியாளர் சந்திப்பில் உரையாற்றியபோது டாக்டர் சந்தன கஜநாயக்க இந்த தகவல்களை வெளியிட்டார். இந்த ஆய்வு மார்ச் 10 ஆம் தேதி தொடங்கி நவம்பர் மாதம் வரை நடைபெறவுள்ளது.

முன்னதாக 2015–2016 காலப்பகுதியில் தேசிய வாய்சுகாதார ஆய்வு நடத்தப்பட்டிருந்தது. நாடுகள் தங்களின் வாய்சுகாதார நிலையை மதிப்பிட ஒவ்வொரு 10 ஆண்டுகளுக்கும் ஒருமுறை இத்தகைய ஆய்வுகளை நடத்த வேண்டும் என உலக சுகாதார அமைப்பு பரிந்துரைக்கிறது.

முந்தைய ஆய்வுகளின் படி, 12 வயது குழந்தைகளில் சுமார் 30 சதவீதத்துக்கு பல் சிதைவு இருந்ததாகவும், இது 1982–1983 ஆம் ஆண்டுகளில் நடத்தப்பட்ட முதல் தேசிய ஆய்வில் பதிவான 70 சதவீதத்துடன் ஒப்பிடுகையில் குறைவாக இருப்பதாகவும் குறிப்பிடப்பட்டுள்ளது.

அதேவேளை, ஐந்து வயதிற்குக் கீழ் உள்ள குழந்தைகளில் சுமார் 63 சதவீதத்துக்கு பல் சிதைவு இருப்பதும் ஆய்வுகளில் கண்டறியப்பட்டுள்ளது.

மேலும், நாட்டில் 75 சதவீதத்திற்கும் மேற்பட்டோர் பற்பசையை பயன்படுத்துவது பல் ஆரோக்கியத்தில் நல்ல முன்னேற்றமாகக் கருதப்படுவதாகவும் கூறப்படுகிறது. எனினும் பொருளாதார நெருக்கடியால் பற்பசை விலை அதிகரித்ததால், மீண்டும் பல் பொடி தயாரிப்புகள் சந்தையில் அதிகரித்து வருவதாகவும் அவர் எச்சரித்துள்ளார்.

பல் பொடிகளில் உள்ள கரடுமுரடான தன்மை பற்களுக்கு சேதத்தை ஏற்படுத்தக்கூடும் என்றும் டாக்டர் சந்தன கஜநாயக்க தெரிவித்துள்ளார்.