வைத்தியர்களின் போராட்டம் தீவிரம்: GMOA வெளியிட்ட முக்கிய அறிவிப்பு

அரச வைத்திய அதிகாரிகள் சங்கம் (GMOA) முன்னெடுத்து வரும் தொடர்ச்சியான தொழிற்சங்க நடவடிக்கைகளை எதிர்வரும் பெப்ரவரி 02 ஆம் திகதி முதல் தீவிரப்படுத்த தீர்மானித்துள்ளது.

இது தொடர்பான தீர்மானம், இன்று (31.01.2026) காலை நடைபெற்ற சங்கத்தின் அவசர செயற்குழுக் கூட்டத்தில் எடுக்கப்பட்டதாக அறிவிக்கப்பட்டுள்ளது.

பல்வேறு கோரிக்கைகளை முன்வைத்து, கடந்த ஜனவரி 26 ஆம் திகதி முதல் நாடு முழுவதிலும் உள்ள அரச வைத்தியசாலைகளை உள்ளடக்கிய வகையில் இந்த தொழிற்சங்க நடவடிக்கை ஆரம்பிக்கப்பட்டது.

இதன் போது, சங்கத்தின் மத்திய செயற்குழு, தமது பிரச்சினைகளுக்கு முறையான தீர்வுகளை முன்வைக்க சுகாதார அமைச்சருக்கு 48 மணி நேர அவகாசம் வழங்கியிருந்தது.

ஆனால், அந்த காலப்பகுதிக்குள் உரிய தீர்வுகள் முன்வைக்கப்படாத நிலையில், போராட்டத்தை மேலும் வலுப்படுத்த தீர்மானிக்கப்பட்டுள்ளதாக GMOA தெரிவித்துள்ளது.

நடைமுறைக்கு வரும் புதிய கட்டுப்பாடுகள்

பெப்ரவரி 02 முதல் பின்வரும் நடவடிக்கைகள் அமல்படுத்தப்படும் என அறிவிக்கப்பட்டுள்ளது:

வைத்தியசாலைகளில் கையிருப்பில் இல்லாத மருந்துகள் மற்றும் மருத்துவ உபகரணங்களை வெளியில் இருந்து பெற்றுக்கொள்ளுமாறு நோயாளர்களுக்கு பரிந்துரை செய்து மருந்துச் சீட்டு வழங்குவது நிறுத்தப்படும்.

வைத்தியசாலைகளில் மேற்கொள்ள முடியாத ஆய்வகப் பரிசோதனைகளை வெளியில் செய்து கொள்ளுமாறு பரிந்துரைப்பது நிறுத்தப்படும்.

அரசியல் குழுக்களினால் ஏற்பாடு செய்யப்படும் சுகாதார முகாம்கள் மற்றும் கிளினிக்குகளில் வைத்தியர்கள் தன்னார்வமாக பங்கேற்பதிலிருந்து விலகுவர்.

போதிய வைத்தியர்கள் இல்லாத நிலையில், வைத்தியசாலைகளில் புதிதாக திறக்கப்படும் வார்டுகள் அல்லது பிரிவுகளுக்கு வைத்தியர்களை இணைப்பது நிறுத்தப்படும்.

நோயாளிகளின் பாதுகாப்பு, தனிப்பட்ட இரகசியத்தன்மை மற்றும் போதுமான ஊழியர் வசதிகள் இல்லாத சூழ்நிலைகளில் நோயாளிகளைப் பரிசோதிப்பதிலிருந்து வைத்தியர்கள் விலகுவர்.

விசேட வைத்திய நிபுணர்கள் தாம் நியமிக்கப்பட்ட வைத்தியசாலையில் மட்டுமே சேவையாற்றுவர். விசேட நிபுணர்கள் இல்லாத பிற வைத்தியசாலைகளுக்கு சென்று மேலதிக கடமைகளை ஆற்றுவதிலிருந்து அவர்கள் விலகிக் கொள்வர்.

இந்த கடும் தொழிற்சங்க நடவடிக்கைகள் எதிர்வரும் திங்கட்கிழமை முதல் நடைமுறைக்கு வரும் என அரச வைத்திய அதிகாரிகள் சங்கம் அறிவித்துள்ளது.