உள்ளூராட்சித் தேர்தலுக்கான வாக்குச் சீட்டுகளை பெறாத வாக்காளர்களுக்கு வெளியான விசேட தகவல்

உள்ளூராட்சித் தேர்தலுக்கான உத்தியோகபூர்வ வாக்குச் சீட்டுகளை இன்னும் பெறாதவர்கள், இணையத்தின் மூலம் அவற்றைப் பெறுவதற்கான வாய்ப்பு வழங்கப்பட்டுள்ளதாக தேர்தல்கள் ஆணையர் ஜெனரல் சமன் ஸ்ரீ ரத்நாயக்க தெரிவித்துள்ளார். 

வீடுகளுக்கு நேரடியாக வாக்குச் சீட்டுகளை விநியோகிக்கும் பணிகள் ஏற்கனவே ஏப்ரல் 29ஆம் திகதியுடன் நிறைவடைந்துள்ளன. எனவே, வாக்குச் சீட்டுகள் கிடைக்காதவர்கள் மே மாதம் 6ஆம் திகதி வரை அலுவலக நேரங்களில் தங்கள் உள்ளூர் தபால் நிலையத்துக்குச் சென்று, தங்களது அடையாளங்களைச் சரிபார்த்த பின் வாக்குச் சீட்டைப் பெற்றுக் கொள்ளலாம்.

இதற்குப் பதிலாக, வாக்காளர்கள் இணைய சேவையைப் பயன்படுத்தி வீட்டிலிருந்தே வாக்குச் சீட்டுகளை பதிவிறக்கம் செய்யும் வசதியும் ஏற்படுத்தப்பட்டுள்ளது. https://eservices.elections.gov.lk என்ற இணையதளத்தை அணுகி, “குடிமக்களுக்காக” என்ற பிரிவின் கீழ் உள்ள “தேர்தல்களுக்கான வாக்காளர் பதிவு தகவல்” சேவையைத் தேர்ந்தெடுக்க வேண்டும். 

பின்னர், தேசிய அடையாள அட்டை எண்ணை பதிவு செய்து, “நான் ஒரு ரோபோ அல்ல” என்ற சோதனையை முடித்து “சரி” என்பதை அழுத்தி, பிறகு “காட்டு” பொத்தானை கிளிக் செய்வதன் மூலம் வாக்காளர் பதிவுத் தகவல்களைப் பெற முடியும். 

அதன்பின், “மொபைல் தொலைபேசி எண்” புலத்தில் கைபேசி எண்ணை பதிவு செய்து மீண்டும் சோதனை முடித்து, சமர்ப்பி பொத்தானை அழுத்தினால் உத்தியோகபூர்வ வாக்குச் சீட்டை நேரடியாக பதிவிறக்கம் செய்யலாம்.