நன்னடத்தை மையத்தில் சிறுவர்கள் மீது கொடூர தாக்குதல் - 5 ஊழியர்கள் கைது செய்யப்பட்டு விளக்கமறியலில்!

பதுளை மாவட்டத்தின் வெலிமடை பகுதியில் அமைந்துள்ள சிறுவர் நன்னடத்தை மையமொன்றில் சிறுவர்கள் மீது மேற்கொள்ளப்பட்ட தாக்குதல் சம்பவம் பெரும் அதிர்ச்சியை ஏற்படுத்தியுள்ளது.

இந்த சம்பவம் தொடர்பில் ஐந்து ஊழியர்கள் கைது செய்யப்பட்டு, 14 நாட்கள் விளக்கமறியலில் வைக்கப்பட்டுள்ளனர்.

அங்கு தங்கியிருந்த 12 முதல் 18 வயதுக்குட்பட்ட சிறுவர்கள் மீது ஊழியர்கள் தடிகளால் தாக்குதல் நடத்தியதாக ஆரம்ப விசாரணைகளில் தெரியவந்துள்ளது. இந்த தாக்குதல் குறித்து 119 அவசர அழைப்பு எண்ணின் மூலம் கிடைத்த முறைப்பாட்டின் அடிப்படையில் பொலிஸார் விசாரணைகளை ஆரம்பித்தனர்.

இதனையடுத்து மேற்கொள்ளப்பட்ட நடவடிக்கைகளின் பேரில், சம்பவத்தில் தொடர்புடைய ஐந்து சந்தேகநபர்கள் வெலிமடை பொலிஸாரால் கைது செய்யப்பட்டு நீதிமன்றத்தில் ஆஜர்ப்படுத்தப்பட்டனர்.

அவர்களை விசாரித்த நீதவான், 14 நாட்கள் விளக்கமறியலில் வைக்க உத்தரவிட்டுள்ளார்.

இந்நிலையில், பாதிக்கப்பட்ட சிறுவர்களின் பாதுகாப்பை உறுதி செய்வதற்கும், சம்பவத்தின் முழுமையான பின்னணியை வெளிச்சமிடுவதற்கும் பொலிஸார் மேலதிக விசாரணைகளை தொடர்ந்து முன்னெடுத்து வருகின்றனர்.