இரு பெண்களை கடத்திக் கொன்றதால் மரண தண்டனை பெற்ற முன்னாள் அமைச்சரின் மனைவி : வழங்கப்பட்ட சர்ச்சைக்குரிய பொதுமன்னிப்பு மீண்டும் நீதிமன்றத்தில்!

முன்னாள் அமைச்சர் மில்ரோய் பெர்னாண்டோவின் மனைவி மேரி ஜூலியட் மோனிகா பெர்னாண்டோவுக்கு வழங்கப்பட்ட ஜனாதிபதி மன்னிப்பு, சர்ச்சைக்குரிய ஒரு முக்கிய எடுத்துக்காட்டாக அட்டர்னி ஜெனரல் திணைக்களம் நேற்று புதன்கிழமை சுட்டிக்காட்டியது.

சிறைச்சாலைகள் திணைக்களத்தால் சட்டவிரோதமாக கைதிகள் விடுவிக்கப்பட்டதாகக் கூறப்படும் வழக்குகள் கொழும்பு மாஜிஸ்திரேட் நீதிமன்றத்தில் விசாரணைக்கு எடுத்துக்கொள்ளப்பட்ட போது இந்த விவகாரம் எழுப்பப்பட்டது.

2005ஆம் ஆண்டு இரண்டு பெண்களை கடத்தி கொலை செய்த குற்றத்திற்காக மேரி ஜூலியட் குற்றவாளியாக்கப்பட்டு மரண தண்டனை விதிக்கப்பட்டார்.

ஆனால், 2009 மார்ச் மாதம், அப்போதைய ஜனாதிபதி மஹிந்த ராஜபக்ஷவால் வழங்கப்பட்ட ஜனாதிபதி மன்னிப்பின் மூலம், சர்வதேச மகளிர் தினத்துடன் இணைந்து அவர் விடுவிக்கப்பட்டார்.

இந்த விவகாரம், இடைநிறுத்தப்பட்ட சிறைச்சாலைகள் ஆணையாளர் ஜெனரல் துஷார உபுல்தெனியவுடன் தொடர்புடைய வழக்கு விசாரணையின் போது மீண்டும் கவனத்திற்கு வந்தது.

அனுராதபுர சிறையில் இருந்து ஒரு கைதியை வெசாக் பௌர்ணமி ஜனாதிபதி மன்னிப்பின் கீழ் சட்டவிரோதமாக விடுவிக்க உதவியதாகக் கூறப்படும் குற்றச்சாட்டில் துஷார ஜூன் 9 அன்று குற்றப் புலனாய்வுத் திணைக்களத்தால் (CID) கைது செய்யப்பட்டார்.

அவர் ஜூலை 9 வரை மீண்டும் விளக்கமறியலில் வைக்கப்பட்டுள்ளார்.