2026ஆம் ஆண்டில் நாட்டின் ஒட்டுமொத்த அரச வருமானம் தொடர்பில் நிதி அமைச்சு வெளியிட்ட தகவல்!

2025ஆம் ஆண்டுடன் ஒப்பிடுகையில், 2026ஆம் ஆண்டில் இலங்கையின் மொத்த அரச வருமானம் குறைவடையும் என நிதி அமைச்சு தெரிவித்துள்ளது.

2027ஆம் ஆண்டுக்காக வெளியிடப்பட்ட நிதி மூலோபாய அறிக்கையின்படி, மானியங்கள் உள்ளிட்ட மொத்த அரச வருமானம் 2025ஆம் ஆண்டில் மொத்த உள்நாட்டு உற்பத்தியில் 16.7 சதவீதமாக இருந்தது. இது 2026ஆம் ஆண்டில் 15.8 சதவீதமாக குறையும் என எதிர்பார்க்கப்படுகிறது.

2025ஆம் ஆண்டில் வாகன இறக்குமதி மீண்டும் தொடங்கப்பட்டதன் மூலம் ஒருமுறை அதிகரித்த வரி வருமானம் கிடைத்திருந்தது. அந்த சிறப்பு வருவாய் விளைவு முடிவடைந்ததையடுத்து, வருமான சேகரிப்பு மீண்டும் சாதாரண நிலைக்கு திரும்பியதே இந்த வீழ்ச்சிக்கு முக்கிய காரணமாகும் என நிதி அமைச்சு குறிப்பிட்டுள்ளது.

மேலும், மத்திய கிழக்கின் புவிசார் அரசியல் சூழ்நிலைகள், உலகளாவிய வர்த்தக மாற்றங்கள் மற்றும் எரிசக்தி சந்தையில் ஏற்படக்கூடிய தடங்கல்கள் ஆகியவை எதிர்காலத்தில் அரச வருமான இலக்குகளை அடைவதில் சவால்களை உருவாக்கக்கூடும் எனவும் நிதி அமைச்சு எச்சரித்துள்ளது.