வைத்தியசாலைகளில் இன்று திடீர் வேலைநிறுத்தம்; கதிரியக்க தொழில்நுட்ப சேவைகள் முடக்கம்

நாடு முழுவதும் உள்ள அனைத்து அரச வைத்தியசாலைகளிலும் இன்று (21) காலை 8.00 மணி முதல் 24 மணித்தியால அடையாள வேலைநிறுத்தப் போராட்டம் ஆரம்பிக்கப்படுவதாக அரச கதிரியக்க தொழில்நுட்பவியலாளர்கள் சங்கம் அறிவித்துள்ளது.

மாளிகாவத்தை சிறுநீரக வைத்தியசாலையின் பிரதிப் பணிப்பாளர் மேற்கொண்டு வரும் தன்னிச்சையான நடவடிக்கைகளுக்கு எதிராக சுகாதார அமைச்சு இதுவரை உரிய நடவடிக்கை எடுக்காததை கண்டித்தே இந்த வேலைநிறுத்தம் முன்னெடுக்கப்படுவதாக அந்தச் சங்கத்தின் தலைவர் சானக தர்மவிக்ரம தெரிவித்துள்ளார்.

இதன் காரணமாக அரச வைத்தியசாலைகளில் கதிரியக்க (Radiology) தொடர்பான சேவைகள் பெரிதும் பாதிக்கப்படவுள்ளதாக தெரிவிக்கப்படுகிறது.

இதனிடையே, அக்கரைப்பற்று வைத்தியசாலையின் வைத்திய அத்தியட்சகருக்கு எதிர்ப்புத் தெரிவித்து கிழக்கு மாகாணத்தில் அரச வைத்திய அதிகாரிகள் சங்கம் ஆரம்பித்துள்ள வேலைநிறுத்தப் போராட்டம் இன்று ஐந்தாவது நாளாகவும் தொடர்ந்து நடைபெறுவதாக அதன் ஊடகப் பேச்சாளர் வைத்தியர் சமில் விஜேசிங்க குறிப்பிட்டுள்ளார்.