ஈரான் ஆன்மீகத் தலைவரின் மறைவு: அகில இலங்கை முஸ்லிம் லீக் வாலிப முன்னணிகளின் சம்மேளனம் இரங்கல்

ஈரானின் ஆன்மீகத் தலைவர் ஆயதுல்லா அலி கமேனி மறைவு குறித்து, அகில இலங்கை முஸ்லிம் லீக் வாலிப முன்னணிகளின் சம்மேளனம் தனது ஆழ்ந்த இரங்கலைத் தெரிவித்துள்ளது.

இது தொடர்பாக அச்சம்மேளனத்தின் தேசியத் தலைவர் எம்.என்.எம். ஷாம் நவாஸ் விடுத்துள்ள இரங்கல் செய்தியில் குறிப்பிடப்பட்டுள்ளதாவது,

“படுகொலை செய்யப்பட்ட மறைந்த ஈரானிய ஆன்மீகத் தலைவர் ஆயத்துல்லா கமேனி, தனது நாட்டு மக்களின் மரியாதைக்குரிய தலைவர் மட்டுமல்ல, உலக வல்லரசுகளின் அநீதிகளுக்கு எதிராகத் துணிச்சலுடன் குரல் எழுப்பிய உலகளாவிய ரீதியிலான ஒரு சிறந்த தலைவராவார். அவரது மறைவு ஈரான் நாட்டிற்கு மாத்திரமன்றி, ஒட்டுமொத்த உலகிற்கும் ஒரு பேரிழப்பாகும்.”

மேலும், குறிப்பாக அண்மைக்காலங்களில் இலங்கையின் அபிவிருத்திப் பணிகளுக்காக, அவரது தலைமையின் கீழ் ஈரானிடமிருந்து கிடைத்த ஒத்துழைப்புகளையும் ஆதரவையும் நாம் மிகுந்த மரியாதையுடனும் நன்றியுடனும் நினைவுகூர்கிறோம்.

அநீதிக்கு எதிராக அச்சமின்றித் தனது தேசத்தை வழிநடத்திய ஒரு மாபெரும் தலைவரை உலகம் இன்று இழந்து நிற்கிறது.

அவரது மறைவினால் துயருற்றிருக்கும் ஈரான் மக்களுக்கும், அவரது குடும்பத்தினருக்கும் எமது சம்மேளனத்தின் சார்பில் ஆழ்ந்த அனுதாபங்களைத் தெரிவித்துக் கொள்கிறோம்.