யாழ்ப்பாணத்தை உலுக்கிய புங்குடுதீவு மாணவி வித்யா கொலை வழக்கு:மரண தண்டனையை உறுதிப்படுத்திய உயர்நீதிமன்றம்!

யாழ்ப்பாணத்தை உலுக்கிய புங்குடுதீவு மாணவி வித்யா கொலை வழக்கில் முக்கியமான தீர்ப்பை உயர்நீதிமன்றம் இன்று (06) வழங்கியுள்ளது.

2015ஆம் ஆண்டு இடம்பெற்ற இந்த கொடூரச் சம்பவத்தில், ‘சுவிஸ் குமார்’ உள்ளிட்ட நால்வருக்கு முன்பு விதிக்கப்பட்டிருந்த மரண தண்டனையை உயர்நீதிமன்றம் உறுதிப்படுத்தியுள்ளது. குற்றவாளிகள் தாக்கல் செய்திருந்த மேன்முறையீடுகள் விசாரணைக்கு எடுத்துக்கொள்ளப்பட்ட பின்னர் இந்த தீர்ப்பு வழங்கப்பட்டது.

அதேவேளை, வழக்கில் தொடர்புடைய மற்ற இரண்டு நபர்களுக்கு விதிக்கப்பட்ட தண்டனைகள் ரத்து செய்யப்பட்டுள்ளதாகவும் அறிவிக்கப்பட்டுள்ளது. தீர்ப்பு அறிவிக்கப்பட்டபோது, சில குற்றவாளிகள் இணைய தொழில்நுட்பத்தின் மூலம் நீதிமன்றத்தில் முன்னிலையாகியிருந்தனர்.

இந்த வழக்கு 2015ஆம் ஆண்டு மே மாதத்தில், பாடசாலை முடிந்து வீடு திரும்பிக் கொண்டிருந்த இளம் மாணவி கடத்தப்பட்டு பாலியல் வன்முறைக்கு உட்படுத்தப்பட்டு கொலை செய்யப்பட்ட சம்பவத்தை அடிப்படையாகக் கொண்டது. இந்தச் சம்பவம் நாடு முழுவதும் கடும் எதிர்வினையை ஏற்படுத்தியது.

இதற்கு முன்னர், 2017ஆம் ஆண்டு மேல் நீதிமன்றம் ஏழு பேரை குற்றவாளிகளாகக் கண்டறிந்து மரண தண்டனை விதித்திருந்தது. பின்னர் அவர்கள் அந்த தீர்ப்பை எதிர்த்து உயர்நீதிமன்றத்தில் மேல்முறையீடு செய்திருந்தனர்.

மேலும், மேல்முறையீட்டு விசாரணைகள் நடைபெற்று வந்த காலத்தில் குற்றவாளிகளில் ஒருவரின் மரணம் ஏற்பட்டிருந்ததும் குறிப்பிடத்தக்கது.