நோயை குணமாக்க வந்த 25 வயது தாயை பாலியல் வன்கொடுமை செய்த 70 வயது வைத்தியர் ; உயர் நீதிமன்றத்தின் அதிரடி தீர்ப்பு!

அனுராதபுரம் உயர் நீதிமன்றத்தில், 25 வயது தாய் ஒருவரை பாலியல் வன்கொடுமை செய்த குற்றச்சாட்டில் குற்றவாளியாகக் காணப்பட்ட வைத்தியருக்கு, 15 ஆண்டுகள் கடுங்காவல் தண்டனை விதிக்கப்பட்டுள்ளது.

இந்தத் தீர்ப்பை உயர் நீதிமன்ற நீதிபதி டொக்டர் நளின் டி ஹேவாவசம் வழங்கினார்.

குற்றம்சாட்டப்பட்ட மருத்துவர், பாதிக்கப்பட்ட பெண்ணுக்கு 15 இலட்சம் ரூபா இழப்பீடாக வழங்க வேண்டும் என நீதிபதி உத்தரவிட்டார்.

இந்த இழப்பீடு செலுத்தப்படாவிட்டால், மேலும் மூன்று ஆண்டுகள் சிறைத்தண்டனை விதிக்கப்படும் என நீதிபதி எச்சரித்தார். 

மேலும், ஒரு இலட்சம் ரூபா அபராதம் செலுத்த வேண்டும் எனவும், அபராதம் செலுத்தப்படாவிட்டால் கூடுதலாக ஒரு வருட சிறைத்தண்டனை விதிக்கப்படும் எனவும் நீதிபதி தெரிவித்தார்.

தீர்ப்பை வழங்கும்போது, குற்றச்சாட்டுகளை அரச தரப்பு வழக்கறிஞர் நியாயமான சந்தேகத்திற்கு இடமின்றி நிரூபித்துவிட்டதாக நீதிபதி டொக்டர் நளின் டி ஹேவாவசம் குறிப்பிட்டார்.

இதன்படி, குற்றம்சாட்டப்பட்ட மருத்துவர் பாலியல் வன்கொடுமைக் குற்றத்தில் குற்றவாளி என அறிவிக்கப்பட்டார்.

இந்த குற்றச் சம்பவம் தொடர்பான வழக்கு விசாரணை அனுராதபுரம் உயர் நீதிமன்றத்தில் மீண்டும் அழைக்கப்பட்டபோது இந்தத் தீர்ப்பு வழங்கப்பட்டது.

தண்டனை பெற்ற மருத்துவர், அனுராதபுரம் திஸ்ஸவெவ பகுதியைச் சேர்ந்த 70 வயது நபர் ஆவார். 

இவர் முன்னர் அனுராதபுரம் போதனா வைத்தியசாலை மற்றும் ரணவிரு வைத்தியசாலையில் பணியாற்றியவர் என்பது குறிப்பிடத்தக்கது.

இந்த குற்றம், 2020 ஜனவரி 20ஆம் திகதி அல்லது அதற்கு அண்மையில், திஸ்ஸவெவ பகுதியில் குற்றவாளி நடத்தி வந்த தனியார் மருத்துவ மையத்தில் நடந்ததாக வழக்கு விசாரணையில் தெரியவந்தது.

இவர் முன்னதாக அனுராதபுரம் காவல்துறையினரால் கைது செய்யப்பட்டு, 

அனுராதபுரம் மாஜிஸ்திரேட் நீதிமன்றத்தில் முன்னிலைப்படுத்தப்பட்டு, பின்னர் பிணையில் விடுவிக்கப்பட்டிருந்தார்.

வடமத்திய மாகாணத்தில் உள்ள நீதிமன்ற வரலாற்றில், ஒரு மருத்துவருக்கு குற்றச்செயலுக்காக இவ்வளவு கடுமையான சிறைத்தண்டனை விதிக்கப்பட்டது இதுவே முதல் முறை என தெரிவிக்கப்படுகிறது.