25,000 புதிய வீடுகள் மேலதிகமாக அமைக்க நடவடிக்கை – ஜனாதிபதி அறிவிப்பு!

‘டித்வா’ புயலால் பாதிக்கப்பட்ட வீடுகளை மீளக் கட்டியெழுப்பும் பணிகளின் கீழ், மேலதிகமாக 20,000 முதல் 25,000 வரை புதிய வீடுகள் அமைக்க வேண்டியுள்ளதாக ஜனாதிபதி அநுர குமார திசாநாயக்க தெரிவித்துள்ளார்.

இன்று (09) முற்பகல் கல்நேவ, ஹந்துன்கம, அலுபெத்த பகுதிகளில் முழுமையாக சேதமடைந்த வீடுகளுக்குப் பதிலாக புதிய வீடுகள் அமைக்கும் திட்டத்தை ஆரம்பித்து வைத்து உரையாற்றும் போது அவர் இதனை தெரிவித்தார்.

தற்போதைய மதிப்பீடுகளின்படி,

• சுமார் 6,000 வீடுகள் முழுமையாக சேதமடைந்துள்ளன
• 17,000 – 18,000 வீடுகள் பகுதியளவில் சேதமடைந்துள்ளதோடு, வசிக்க முடியாத நிலைமையிலும் உள்ளன

இதனால் மொத்தமாக 20,000 – 25,000 வீடுகள் கட்ட வேண்டிய தேவை ஏற்பட்டுள்ளதாக அவர் கூறினார்.

நிதி ஒதுக்கீடு

2026 ஆம் ஆண்டுக்கான வரவுசெலவுத் திட்டத்தில்,

• 31,000 வீடுகள் கட்டுவதற்கு நிதி ஒதுக்கப்பட்டுள்ளது
• ‘எமக்கு ஒரு வீடு’ திட்டத்தின் கீழ் கிராமப்புற வறிய மக்களுக்காக 10,000 வீடுகள்
• தேசிய வீடமைப்பு அதிகார சபையின் மூலம் மேலும் 10,000 வீடுகள்

மேலும்,

• முகாம்களில் வாழும் மக்களுக்காக 2,500 வீடுகள் (ஒவ்வொன்றுக்கும் 20 இலட்சம் ரூபாய்)
• தோட்டப்புற மக்களுக்காக இந்திய உதவியுடன் வீடமைப்புத் திட்டம்

நிவாரண உதவி

• முழுமையாக சேதமடைந்த வீடுகளுக்கு 50 இலட்சம் ரூபாய்
  • ஆரம்பத்தில் 20 இலட்சம் ரூபாய்
  • கட்டுமான முன்னேற்றத்தின் அடிப்படையில் 15 இலட்சம் ரூபாய் வீதம் இரண்டு தவணைகளில் மீதித் தொகை
• பகுதியளவில் சேதமடைந்த வீடுகளுக்கு 5 இலட்சம் ரூபாய்

2–3 மாதங்களுக்குள் வீடமைப்புப் பணிகளை விரைவாக நிறைவு செய்யவும், நிதி வழங்கலில் எந்தத் தாமதமும் இருக்காது என்றும் ஜனாதிபதி உறுதியளித்தார்.

இன்றைய நிகழ்வில் அடையாள ரீதியாக 26 பயனாளிகளுக்கு தலா 50 இலட்சம் ரூபாய் நிதிக்கான ஆவணங்கள் வழங்கப்பட்டதுடன், ஏனைய பயனாளிகளுக்கும் விரைவில் நிதி வழங்கப்படும் என தெரிவிக்கப்பட்டது.

ஒரு மனிதனுக்கான அடிப்படை உரிமைகளான நல்ல வருமானம், சிறந்த கல்வி, ஆரோக்கியமான வாழ்வு, பாதுகாப்பான வீடு மற்றும் மன அமைதி ஆகியவற்றை உறுதிப்படுத்துவதே அரசின் நோக்கம் என ஜனாதிபதி குறிப்பிட்டார்.